سانحہ کارساز کے شہدا کی یاد میں پیپلزپارٹی کی آج کراچی میں سلام شہدا ریلی-

کراچی(اردوپوائنٹ اخبارتازہ ترین۔16اکتوبر2016ء): سانحہ کارساز کے شہدا کی یاد میں پیپلزپارٹی آج ریلی نکالے گی۔ کارساز سے صدر جانے والا روٹ بند کردیا گیا ہے جس سے علاقے کی بڑی عوام محصور ہو کر رہ گئی ہے۔ پیپلز پارٹی کی سلام شہدا ریلی کے لیے ٹریفک پلان ترتیب دے دیا گیا ۔ ڈرگ روڈ سے بلوچ کالونی تک شارع فیصل کے دونوں ٹریک بند کر دیئے گئے ۔ ایم اے جناح روڈ اوراطراف کی سڑکیں کنٹینرزلگا کربند کر دی گئیں ۔حفاظتی انتظامات کے پیش نظر’روٹ پر کمانڈوز سمیت ساڑھے 8 ہزار پولیس اہلکار تعینات ہیں اس ریلی کی وجہ سے کراچی کے شہریوں کی اکثریت گھروں میں محصور ہوگئی ہے-